16 شمروخ الاراجوز

شمروخ الأراجوز
نمرة 16

شكشكة شعرية غير دورية بالفصحى العامية
الورقة العاشرة من دفتر رجوع الشيخ
شرقيات
· أنا مش طمعان فى هواكى

لأن العشق الأيام دى سخيف

فيه ركاكه وعنترية وفتاكه

أو رغبة مكبوته تقتل كل إنسانى

وغرض مخيف

شهوة لفضح الأنثوى بسيف العنترى

محض تسليم واستلام

أمر بإحالة

محض حالة

زى أى وكل حالة

وأنا هوايا غواية طالبة الاستحالة

أن شفت اشوفك نجمة عز الضهر أحلى من القمر
أبعد عليه من رضا السلطان
وخطر تخلى أقرب الخلان عن الاحلام وعنى
ياللى انتى مسكونه بجليد القلب والبال الخلى

أنا المغنى

أنا التقى البالغ من العمر الشقى ما يكفى سنى

كفرت بالحب اللسان

واشتقت للعشق العصى العاصى
التجنى

وانتى ظهرتى زى برق من الثماله

انما دونك بحور من خمر أيامنا الردى
وزحام ضحايا على شطوطك سكرانين
مش مدركين الفرق بين العشق

والهول الخفى
مش عارفين بالحسى فى الصوفى

ولا وهن العفى

ولا مكتفين بعذوبة الدوران حوالى العرش

فى وجد الشقا
عايشين على وعد اللقا

الكل طالبك زهرة تشهد ع الجسارة
وردة فى عروة فارس الفوز

الخسارة
الكل عايزك يابديعه

وديعه ف بنوك المهارة والشطارة
وانا اللى محتاجك لقلبى شمس توهب له الدفا
فى الأمسيات البرد .. وتحرر لسانه من المرارة

رباعيات - لكن وربع
· مخ بلادك مشغول بحجاب الرقاصة وحروب المحمول
الحق العدل الشعر صبح عهده ف مخزن مقفول
المزيكه بقت خانه ف دفتر أحوال العسكر
والعسكر لا بسين مزيكه فى جنازة الحلم المقتول
***
وطنك مهزوم سلم رايته للعجز المسئول

· عملتوا إيه يا صادمين فى شعوبكو
كسرتوا فى روحها شئ داريتوا بيه عيبكو
جشع وجهل وبجاحة لم ترد فى كتاب
وكأن هايجه الكلاب مسعورة فى قلوبكو
***
بقيت اشك أن ليكو إله يحاسبكو

· حرب التحرير الشعبية راجعة بكل ضراوة
حتقول للخاينين والجبنا كفاية غباوة
الدنيا مش سوق للباله وفصل القوات
الدنيا صراع للحرية بالعشق تساوى
***
والعدل أما اتمرر سككه - بتزيده غلاوة

· فيه إيه ؟ مصحى الخلق دى ف وجدانى
شهدى ونصر أبو زيد خميس وعنانى ؟
هيه الهزايم بتقلق نومة الشهدا
ولا الجرايم راجعة تحكم تانى ؟

***
حاظظ عليه البكا - ورعب بنزف أغانى

هموم مصرية
تراحيل الثقافة
إحنا التراحيل الثقافية
رغاوى الحركة الوطنية
بعد النكسات القومية
نجهز للخدمة الفورية

لابسين لها كل الألوان
بمبى مسخسخة رمادية
أو رأسماكية اشترالية
من أجل عولمة حداثية
وسطية على قدر الإمكان
لو حتى نعزف لحن زمان
على دق طبله رسمية
واشهد يا زمان

....................
على حسب وداد الحرية
ألف مجلة وميت جرنان
أسبوعية أو شهرية
فصيلة أن عزت ويومية
سلفية بعمة حداثية
حداثية لابسة الجلابية
متلقحة ولاتين الشوكى
فوق الاقفاص ع الرصفان
وف كل مكان ..
احنا بنكتبها ونقراها
ما احنا الصبيان فى الدكان
لنا فى الأبحاث ياما مباحث
من أيام ذو القرن الباحث
لأيام ذو الوجهين البائس
لغفير الشونة اللى مقايس
ومقسم عقلها فى لجان
وفى بعض احيان
بين ندوه وغدوه و أمسية
بنطبق اثنين وردية
من مؤتمراتها الشهرية
للمهرجانات اليومية
لصحافة الأزمة الدورية
لنا فى تطوير العامية
وتفسير فوازير الواقعية
على ضوء البنية الشعبية
وعلاقة التصوير بالبالة
والنفط بتأصيل الحالة
وتصدير الأزمة النقدية
نرطن بالفصحى بأصالة

أو بالعامية فى هبالة
نلحن فى رزالة أكاديمية
ونحط أبو قرش على أبو قرشين
يبقى الإبداع حسب النية
بدعا الوالدين رزق وغية
فتسود الخطة الأمنية
تتمازج كل الألوان
فى معزوفة سيمفونية
فيها من كل الألحان
فتتوه النغمة الأصلية
*
نرجع نتبروزع الرف

أو نتحنط فى السراديب
نتطبق جوه الدواليب
نستنى إعادة الترتيب
اللى يطير ويا التغيير
وللى يشبط فى القارير
يتشعبط على حجر وزير
أو يلبد فى رئيس تحرير
فاهمها رايحة أو جاية
وحاسبها على قد الدور
للآمر لازم مأمور
والشاطر يلحق له طابور
كل الأصناف ف الجمعية
*
تختفى .. وتعود كرسيك موجود
لغرض محدود حسب الموجود
يا سقوط يا صعود يا وقوف يا قعود
تبهت أحلام الإنسان
*
والتعلب رتبها وفات
فى ديله ملفات سبعات
على جدول حسابات الجات
أو وفق الخطة السلمية
الكل قعد ع الطبلية
يفتى فى الفكرة الأزلية
بالنثر ف خفة شعرية
أو شعرا نثرى الأوزان

محلاها مهمة رسمية
من أجل الوحدة الوطنية
والطاعة لقانون العيب
واوامر الشيخ الحسيب

سهرة بالعشا والمشاريب
القطة يرقصها الديب
على نغم اللحظة التاريخية
يا يسار يا هنود يا يمين يا قرود
إنت الموعود والرضا إحسان
تصبح مانشيت يا مدير ايتكيت

مربوط بالخيط يا محلل زيت
عاصى ورضيت تايب صليت
طايع ح تنول حب المسئول
على طول ح تطول نجمة يا شريط
*
وح تشبع ببواقى الفتافيت
وتخيل فى البدلة الشعبية
خولى التراحيل الثقافية
تدهن للخلق الهوا دوكو
ع المسرح ترقص فريكيكو

فى المهرجانات الشيكابيكو
تنسى حسب الله وشكوكو

وتغنى لروقه وزيكو ريكو
*
ما عادش جراح الكل ارتاح
الكل كتب وخد المفتاح
الكل نشر
والكل اترقى ما عادش نفر
الكل لهف بدلات وسفر
وشتم فى الكل شبع وبطر
اتنفخ الكيس الكرش كبر
كلنا فى الهم بقر وبشر
أكبرنا هزيل واكترنا غفر
واللى اتبروز ع الشاشة ظهر
لما ندهوه بالاسم حضر ..
يكتب ويقول على ميل الغول
مقالات روايات وأغانى تلول
يكفينا شر الجوع والفول
*
ربك قادر ورسمها قدر
فى بلاد بلهارسا وأمية
وكلابها ديابها حرامية
تسكر من ريحه الطعمية
وتهيج من طشة ملوخية
ولذا ومن فخر البشرية
وجزم عسكر رايحة وجاية
خلت تراحيلها الثقافية

بتخربش على وش الميه
ما تسيب على وش النهر أتر

*
وأنا باين كده يا أولاد عكيت
علشان من كتر الغلب نسيت
إنى لغيرها عمرى ما غنيت
ولباب غيرها عمرى ما حجيت
وان كان من طول الصبر بكيت
وف لحظة يأس غلطت شكيت
يكفينى ويشفينى يا إنسان
لو باللى أن حاسه

العار - حسيت

عسل الهوى
· كل ما قربت من وعدك
بتهرب
زى ما يكون انكتب لك
تنتهى كيف ابتديت عمر الهوى
مصلوب على موج البحور
وانت عطشان للغرام خايف لتشرب
الحياة بالحب اصعب
الحياة ما بقتش من حق الجسور
سهلة ع اللى يبيع فيكسب
صعبة ع اللى اتعود الحزن الطهور

طمنينى
قلبى من حرمانى متعب
نحلة مأسور عمره
مرهون بالزهور
الربيع وعده بعسله - ولما يقرب
يتخلق بينه وبين الجنة .. سور

وانت عز الليل باشوفك بتنادينى
دلى يا حبيبتى ضفايرك
كتفينى
وارفعينى لجنة العشق !! سرينى
يضوى ليل خوفى وضعفى –
حتى لو فيه حتفى - نور

شكشكة
ابداع وكفاءة وخبرة
من توشكا لسرة شبرا
الفين مجلس ووزارة
وإدارة جدوى وقدرى
ومراكز بحث شطارة
ترسم لك سكة بكرة
واتأمل أى إشارة
أو موقف سرفيس أجرة
ح تلاقى الأزمة خيارة
فى أيد حنجل على مهرة
بيشد الهوا بدوبارة
وبيفحت نيل بالإبرة
محمى بقوت جبارة
من آل عمران والبقرة
لف لنا العلم فى سيجارة
وطلق جيشه على الصحرا
صدرنا لكندا بصارة
واستوردنا لكو البودرة
خلينا الريف والحارة
يقضوا رمضان ع السفرة
والفن فرص وتجارة
ننسى بها حكاية الثغرة
قيم حفلة قوم بزيارة
قدم للعالم عبرة
شعرك يسود مهارة
حيلك يشتد فياجرا

احنا اللى حشيشنا غبارة
وسبقنا الدول الكبرى
حتى أن قرقشنا حجارة
إحنا الرواد والخبرا
سرهيبتنا الجبارة
غصبن عن أم الشعرا
اللى بيضرب زمارة
ويانا يقش البصرة
طول ما المكلمة دوارة
واللوا ريس ع الاوبرا
لا كل ركوبه حمارة
ولا كل السلاطين أمرا
حسبه ما هياش بخسارة
التعلب طلع الشجرة
مش لازم ترخي ستارة
ولا زيك عندى يا خضرة
أربع لك جوز سقارة
راح تنسى هموم الفقرا

على رأى المثل
رغيف تعوزه البيوت
يحرم أكيدة ع الجوامع

أنا حقى ضى الشمس مش ضايع
ساعة الحساب خربوشة يشبط فيك
حسك عينيك تنسى قديم المواجع
جمر الآهات يعميك
ما تطولش غير وهم
زى الميه ملو إيديك
إذ توب ما هو لك
عمره ما ح يكسيك
نازله السلالم بيك - وظنك طالع !

على حدود الأدب
يا كاتب العصر يا بو الهيبة والشورى
بعد المسلسل نلاقى رواية منشورة
وعامود سياسة وسهرات شبه عائلية
ومسرحية بنجوم - بتكمل الصورة
***
يا هلترى .. النفس راضية والا مكسورة !